សមាគមឧកញ៉ាកម្ពុជា (ស.ឧ.ក.)
បានចុះបញ្ជីត្រឹមត្រូវស្របតាមច្បាប់ជាធរមាន នៃព្រះរាជាណាចក្រកម្ពុជា តាមរយៈលិខិតលេខ ៥៧៥៩ ប្រ.ក. ចុះថ្ងៃទី២៥ ខែតុលា ឆ្នាំ២០២២ របស់ក្រសួងមហាផ្ទៃ និងត្រូវបានសម្ពោធជាផ្លូវការកាលពីថ្ងៃទី១០ ខែមិថុនា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានកិត្តិយស នៃសមាគមឧកញ៉ាកម្ពុជាផងដែរ។
តាមរយៈព្រះរាជក្រឹត្យលេខ នស/រកត/១០២៤/១៣០៩ ចុះថ្ងៃទី២៣ ខែតុលា ឆ្នាំ២០២៤ ស្តីពីគោរមងារឧកញ៉ា បានទទួលស្គាល់សមាគមឧកញ៉ាកម្ពុជា ជាដៃគូរាជរដ្ឋាភិបាលលើការងារដូចខាងក្រោម៖
ជាស្ថាប័នតែមួយគត់ដែលតំណាងឱ្យគោរមវន្តទាំងអស់នៅក្នុងព្រះរាជាណាចក្រកម្ពុជា
- ជួយរាជរដ្ឋាភិបាលលើការពិនិត្យ និងវាយតម្លៃចំពោះសំណើសុំផ្តល់គោរមងារឧកញ៉ាតាមលំដាប់ថ្នាក់
- ជួយរាជរដ្ឋាភិបាលលើការធ្វើបច្ចុប្បន្នភាពបញ្ជីឈ្មោះ និងរៀបចំឯកសណ្ឋានផ្លូវការរបស់គោរមវន្តទាំងអស់នៅព្រះរាជាណាចក្រកម្ពុជា និងធ្វើរបាយការណ៍បច្ចុប្បន្នភាពមកគណៈកម្មការអន្តរក្រសួងពិនិត្យនិងវាយតម្លៃលើសំណើសុំគោរមងារនិងការបញ្ចប់គោរមងារឧកញ៉ា (គ.ព.វ.គ.)
- ជួយរាជរដ្ឋាភិបាលលើការពិនិត្យសំណើសុំផ្តល់ងារជាកិត្តិយស ការលើកទឹកចិត្ត ឬការចាត់តាំងក្នុងមុខងារនានាដល់គោរមវន្ត
- ជាដៃគូមួយរបស់រាជរដ្ឋាភិបាល ក្នុងការជំរុញលើកកម្ពស់សេដ្ឋកិច្ច សកម្មភាពពាណិជ្ជកម្មនិងការវិនិយោគ ព្រមទាំងសកម្មភាពផ្សេងៗទៀត ដើម្បីប្រយោជន៍ដល់សង្គមជាតិនិងអនុវត្តការងារផ្សេងៗទៀត ដែលកំណត់ដោយរាជរដ្ឋាភិបាល។
សូមបញ្ជាក់ដែរថា យោងតាម សេចក្តីសម្រេចលេខ ៣៥០ សជណ ចុះថ្ងៃទី២៨ ខែមីនា ឆ្នាំ២០២៣ របស់ទីស្តីការគណៈរដ្ឋមន្ត្រី បានយល់ព្រមដាក់សមាគមឧកញ៉ាកម្ពុជាឱ្យស្ថិតនៅក្រោមអភិបាលកិច្ចផ្នែកបច្ចេកទេសរបស់ក្រុមប្រឹក្សាអភិវឌ្ឍន៍កម្ពុជា (ក.អ.ក.) សំដៅជំរុញលើកកម្ពស់ការធ្វើពាណិជ្ជកម្មនិងវិនិយោគនៅព្រះរាជាណាចក្រកម្ពុជា។
គិតត្រឹមខែកញ្ញា ឆ្នាំ២០២៥ សមាគមឧកញ៉ាកម្ពុជា មានសមាជិកចំនួន ៤៣៨ រូបដែលមានគោរមងារជា លោកអ្នកឧកញ៉ា អ្នកឧកញ៉ា និង ឧកញ៉ា ហើយសុទ្ធសឹងតែជាពាណិជ្ជករដ៏មានសក្តានុពលដែលកំពុងប្រកបអាជីវកម្ម និងកាន់កាប់ជំនួញពហុវិស័យគ្របដណ្តប់ទូទាំងប្រទេសកម្ពុជាដោយបានបំពេញកាតព្វកិច្ចលើការបង់ពន្ធជូនរដ្ឋ ការបង្កើតការងាររាប់សិបកន្លែងនៅទូទាំងប្រទេស ការកាត់បន្ថយភាពក្រីក្រ ព្រមទាំងការទាក់ទាញវិនិយោគិនបរទេសដើម្បីរួមចំណែកដល់ការពង្រឹង និងអភិវឌ្ឍវិស័យសេដ្ឋកិច្ចជាតិស្របតាមគោលនយោបាយរបស់រាជរដ្ឋាភិបាលកម្ពុជាអាណត្តិទី៧ ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខដ៏ស្វាហាប់ និងឈ្លាសវៃ។
ទស្សនវិស័យ៖
ទស្សនវិស័យរបស់ ស.ឧ.ក. គឺរក្សានិងលើកកម្ពស់ឧត្តមភាពដ៏ឧត្តុងឧត្តមនៃគោរមងារឧកញ៉ាតាមរយៈការចូលរួមអភិវឌ្ឍសង្គម និងសេដ្ឋកិច្ចកម្ពុជាប្រកបដោយចីរភាព និងបរិយាបន្ន បង្កើតបាននូវភាពសុខសាន្ត សុខដុមរមនា និងការរីកចម្រើនខាងកម្រិតជីវភាពរបស់ប្រជាពលរដ្ឋបានល្អប្រសើរដូចបណ្តាប្រទេសអភិវឌ្ឍន៍នានាដោយរួមចំណែកគ្រប់វិស័យជាមួយស្ថាប័នជាតិ និងអន្តរជាតិ។
ជាមួយគ្នានេះ ស.ឧ.ក. មានគោលបំណងលើកកម្ពស់គុណតម្លៃ នៃគោរមងារឧកញ៉ា និងធានាបាននូវសេចក្តីថ្លៃថ្នូរ សីលធម៌ និងសាមគ្គីភាពរឹងមាំរបស់ឧកញ៉ា ដើម្បីជាមូលដ្ឋានក្នុងការចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា សំដៅចូលរួមកសាងនិងអភិវឌ្ឍសង្គម សេដ្ឋកិច្ចកម្ពុជា ជាពិសេសសកម្មភាពសង្គមកិច្ច មនុស្សធម៌ និងសប្បុរិសធម៌ផងដែរ។
បេសកកម្ម៖
បេសកកម្មចម្បងៗរបស់ ស.ឧ.ក. រួមមាន៖
១. ធ្វើជាតំណាង និងការពារផលប្រយោជន៍ស្របច្បាប់ កិត្តិយស និងសេចក្តីថ្លៃថ្នូររបស់គោរមវន្តដែលជាសមាជិក
២. កសាងទំនាក់ទំនងឱ្យមានភាពស្និទ្ធស្នាលប្រកបដោយមិត្តភាព សាមគ្គីភាព សហប្រតិបត្តិការ ដោយបង្ហាញនូវឆន្ទៈពិតប្រាកដដើម្បីបង្កើតឱ្យមានជំនឿទុកចិត្តគ្នាក្នុងភាពជាមហាគ្រួសារឧកញ៉ា
៣. បង្រួបបង្រួមមហាគ្រួសារឧកញ៉ាកម្ពុជា ដើម្បីរក្សាទំនាក់ទំនង ការផ្លាស់ប្តូរព័ត៌មាន ការពិគ្រោះយោបល់អំពីតម្រូវការចាំបាច់ ក្នុងការជួយគ្នាទៅវិញទៅមក
៤. ចូលរួមចំណែកក្នុងសកម្មភាពសង្គម និងសប្បុរិសធម៌នានា ដើម្បីបង្កើនកិត្យានុភាព ឧត្តមភាព និងគុណធម៌របស់គោរមងារឧកញ៉ាឱ្យកាន់តែរីកចម្រើន និងឆ្ពោះទៅកាន់វឌ្ឍនភាពដ៏ល្អប្រពៃ រុងរឿងខ្ពង់ខ្ពស់នាពេលអនាគត
៥. លើកកម្ពស់ការគោរពច្បាប់ និងលិខិតបទដ្ឋានគតិយុត្តនានានៅក្នុងព្រះរាជាណាចក្រកម្ពុជា
៦. ជំរុញ និងផ្សព្វផ្សាយសក្តានុពល កាលានុវត្តភាព និងនវានុវត្ត៍ថ្មីៗនៅក្នុងព្រះរាជាណាចក្រកម្ពុជា
៧. បង្កើតវេទិកា សិក្ខាសាលា ពិរព័ណ៍បង្ហាញស្នាដៃថ្មីៗ និងការផ្លាស់ប្តូរបទពិសោធន៍ពាក់ព័ន្ធនឹងធុរកិច្ច ពាណិជ្ជកម្ម ការវិនិយោគ និងវិស័យដទៃទៀតដែលជាគុណប្រយោជន៍សម្រាប់សង្គម និងសេដ្ឋកិច្ច នៃព្រះរាជាណាចក្រកម្ពុជា។
